आर्थिक पाटी संवाददाता

तिहारमा बत्ती, रङ तथा फूलको विशेष महत्व हुन्छ । यस पर्वमा यस्ता सामग्रीले घर सजाउने गरिन्छ । रङ्गोली बनाएर पनि तिहारको उत्सव मनाइन्छ । नेपालको तराई क्षेत्रमा घर सजाउन तथा उत्सव मनाउन प्राचीन समयदेखि नै रङ्गोली बनाउने परम्परा छ ।

तिहार नजिकिँदै गर्दा नेपाली बजारमा विभिन्न सरसामग्री किन्नेहरूको चहलपहल बढेको छ । अन्य बजारको जस्तै तिहारमा अधिक मात्रामा विक्री हुने चाँदी तथा तामा पित्तलका भाँडाकुडा बजारमा पनि चाप बढ्न थालेको छ । तामा र पित्तलको भाँडाकुडाका लागि उपत्यकामा पाटन शहर प्रसिद्ध छ ।

अहिले देशैभर तिहारको रमझम शुरू भइसकेको छ । घरआँगनमा ढकमक्क फूल फुलेका छन्, घरकोठाको सजावट र रङरोगन गरिँदै छ, विदेशिएका दाजुभाइहरू घर फर्कन थालेका छन् भने दिदीबहिनीहरूले यो उत्सवलाई ‘विशेष’ बनाउन सोहीअनुसार तयारी थाल्दै छन् ।