सेनेगललाई अतिरिक्त समयमा हराउँदै बेल्जियम अन्तिम १६ मा
काठमाडौँ । फिफा विश्वकप २०२६ को राउन्ड अफ ३२ अन्तर्गत आज सम्पन्न निकै रोमाञ्चक र उतारचढावले भरिएको खेलमा बेल्जियमले २ गोलले पछि परेको स्थिति उल्टाउँदै सेनेगलमाथि ३–२ को ऐतिहासिक पुनरागमन जित हासिल गरेको छ।
सिएटल स्टेडियममा अतिरिक्त समयसम्म पुगेको यस खेलको १२०औँ मिनेटमा प्राप्त पेनाल्टीलाई गोलमा परिणत गर्दै युरी टिलेमान्स बेल्जियमका लागि नायक बने। यो जितसँगै बेल्जियम प्रतियोगिताको अन्तिम १६ मा प्रवेश गरेको छ भने उत्कृष्ट प्रदर्शनका बावजुद सेनेगल स्तब्ध बन्दै बाहिरिएको छ।
खेलको २४औँ मिनेटमा सेनेगलका हबिब डिएराले गोल गर्दै टोलीलाई सुरुवाती अग्रता दिलाए। सादियो मानेको क्रसमा इस्माइला सारको हेडर पोस्टमा लागेर फर्किएपछि प्राप्त रिबाउन्ड बललाई डिएराले प्रहार गरेका थिए। दोस्रो हाफको सुरुवातमै (५१औँ मिनेट) इस्माइला सारले उत्कृष्ट गोल गर्दै सेनेगलको अग्रता २–० को बलियो स्थितिमा पुर्याए। यस समयसम्म सेनेगलले खेल पूर्ण रूपमा आफ्नो नियन्त्रणमा राखेको देखिन्थ्यो।
खेलको अन्त्यतिर बेल्जियमले अप्रत्याशित पुनरागमन गर्यो। ८६औँ मिनेटमा मैदान प्रवेश गरेका वैकल्पिक खेलाडी रोमेलु लुकाकुले गोल गर्दै खेललाई २–१ मा ल्याए। त्यसको तीन मिनेटपछि नै (८९औँ मिनेट) सेनेगलिज गोलकिपर मोरी डियाव र डिफेन्सको तालमेल अभावको फाइदा उठाउँदै युरी टिलेमान्सले बराबरी गोल फर्काएपछि खेल अतिरिक्त समयमा धकेलिएको थियो।
अतिरिक्त समयको दोस्रो हाफको अन्तिम मिनेटमा बेल्जियमले भीएआरको सहयोगमा पेनाल्टीको अवसर पायो। उक्त दबाबपूर्ण क्षणमा युरी टिलेमान्सले कुनै गल्ती नगरी गोल गर्दै बेल्जियमको सनसनीपूर्ण जित सुनिश्चित गरे।
बेल्जियमले विश्वकपको नकआउट चरणमा २ गोलले पछि परेको स्थिति उल्टाएर खेल जितेको यो इतिहासमा दोस्रो पटक हो। यसअघि सन् २०१८ को विश्वकपमा जापानविरुद्ध बेल्जियमले यस्तै पुनरागमन जित निकालेको थियो।
