कुमारी बैंकको नाफा र प्रतिशेयर आम्दानीमा उल्लेख्य वृद्धि
काठमाडौं । कुमारी बैंक लिमिटेडले चालू आर्थिक वर्ष २०८१/८२ को दोस्रो त्रैमासिक वित्तीय विवरण सार्वजनिक गरेको छ। सार्वजनिक विवरण अनुसार बैंकको नाफा, आम्दानी र सञ्चालन नाफामा उल्लेख्य वृद्धि भएको छ भने प्रतिशेयर आम्दानीमा पनि ठूलो उछाल देखिएको छ।
बैंकले गत आर्थिक वर्षको पुस मसान्तसम्म २७ करोड ५३ लाख रुपैयाँ खुद नाफा कमाएकोमा चालू आवको सोही अवधिमा ८८७.९४ प्रतिशतले बढेर २ अर्ब ७२ करोड रुपैयाँ पुगेको छ।
त्यसैगरी बैंकको खुद ब्याज आम्दानी गत आवको पुस मसान्तसम्म ५ अर्ब ३१ करोड ३९ लाख रुपैयाँ रहेकोमा चालू आवको सोही अवधिमा २७.६५ प्रतिशतले बढेर ६ अर्ब ७८ करोड ३५ लाख रुपैयाँ पुगेको छ। खुद फी तथा कमिशन आम्दानी १ अर्ब २७ करोड ७ लाख रुपैयाँबाट बढेर १ अर्ब ६० करोड ९२ लाख रुपैयाँ पुगेको छ भने कुल सञ्चालन आम्दानी ७ अर्ब ८ करोड ३६ लाख रुपैयाँबाट बढेर ९ अर्ब २१ करोड २९ लाख रुपैयाँ पुगेको छ।
आम्दानीमा उल्लेख्य वृद्धि भएसँगै बैंकको सञ्चालन नाफामा पनि ठूलो उछाल आएको छ। गत आवको पुस मसान्तसम्म ७२ करोड १५ लाख रुपैयाँ सञ्चालन नाफा गरेको बैंकले चालू आवमा ५०५.१५ प्रतिशतको वृद्धि गर्दै ४ अर्ब ३६ करोड ६५ लाख रुपैयाँ सञ्चालन नाफा कमाएको छ।
बैंकको प्रतिशेयर आम्दानी (EPS) २.१० रुपैयाँबाट बढेर २०.७४ रुपैयाँ पुगेको छ। खराब कर्जा अनुपात (एनपीएल) ६.९६ प्रतिशतबाट सामान्य घटेर ६.९२ प्रतिशतमा झरेको छ। बैंकको प्रतिशेयर नेटवर्थ १५१.१६ रुपैयाँ रहेको छ भने मूल्य आम्दानी अनुपात (P/E Ratio) ८.६३ गुणा रहेको छ।
तर बैंकको वितरणयोग्य मुनाफा २ अर्ब ९८ करोड ७१ लाख रुपैयाँ ऋणात्मक रहेको छ। बैंकको चुक्ता पूँजी २६ अर्ब २२ करोड रुपैयाँ रहेको छ भने जगेडा कोषमा २ अर्ब ९८ करोड रुपैयाँ ऋणात्मक रहेको छ। रिजर्भमा भने १६ अर्ब ४० करोड रुपैयाँ सञ्चित रहेको छ।
समीक्षा अवधिमा बैंकले २ खर्ब ६५ अर्ब ९५ करोड रुपैयाँ कर्जा प्रवाह गरेको छ भने ३ खर्ब ७१ अर्ब ३७ करोड रुपैयाँ निक्षेप संकलन गरेको छ।
