तत्काल कर प्रणाली सुधारले मात्र आर्थिक रुपान्तरणको मार्ग प्रशस्त गर्छ: सीएनआई अध्यक्ष पाण्डे
काठमाडौँ । नेपाल उद्योग परिसंघ (सीएनआई) का अध्यक्ष वीरेन्द्रराज पाण्डेले उच्चस्तरीय आर्थिक सुधार सुझाव आयोगको प्रतिवेदनले लिएको सुझाव, विशेषगरी कर प्रणाली सुधार केन्द्रित आर्थिक रुपान्तरणको मार्गचित्रप्रति स्वागत व्यक्त गरेका छन् ।
बुधबार आयोजित ‘राजस्व प्रणालीमा सुधार, सार्वजनिक निजी संवाद’ कार्यक्रममा बोल्दै अध्यक्ष पाण्डेले सीएनआईले मुलुकको औद्योगिक वातावरण निर्माण र आर्थिक विकासमा सधैँ महत्वपूर्ण साझेदारको भूमिका निर्वाह गर्दै आएको बताए ।
आयोगको सुझाव र निजी क्षेत्रको संलग्नता
अध्यक्ष पाण्डेले उच्चस्तरीय आर्थिक सुधार सुझाव आयोगमा पहिलो पटक निजी क्षेत्रलाई सदस्य बनाइएको र सीएनआईका तर्फबाट राजेशकुमार अग्रवाल सदस्य बनाइएकोमा खुसी व्यक्त गरे ।
कार्यान्वयनमा जोडः उनले यसअघि बनेका आयोग।समितिका सुझावहरू कार्यान्वयन नभएको भए पनि यो आयोगको प्रतिवेदन कार्यान्वयनमा भने सरकारले निकै महत्व दिएको विश्वास व्यक्त गरे ।
संवादको उद्देश्यः निजी क्षेत्रको समेत संलग्नता भएकाले यस आयोगको सुझाव कार्यान्वयनका लागि आवश्यक पहल गर्नुपर्छ भनेर नै ‘आर्थिक रुपान्तरणको मार्गचित्र’ शीर्षकमा सार्वजनिक-निजी संवाद सुरु गरिएको उनले प्रस्ट पारे ।
कर सुधारको आवश्यकता र वर्तमान चुनौती
अध्यक्ष पाण्डेले मुलुकको अर्थतन्त्र चुनौतीपूर्ण अवस्थामा रहेको औँल्याउँदै लगानी अभिवृद्धि र औद्योगिक वातावरण निर्माणका लागि कर प्रणालीमा तत्काल सुधार आवश्यक रहेकोमा जोड दिए ।
वर्तमान आर्थिक चुनौतीहरूः
-बैंकहरूमा लगानी योग्य रकम भए पनि समग्र बजार माग बढ्न सकेको छैन।
-मागमा वृद्धि नआउँदा उद्योगहरू न्यून क्षमतामा सञ्चालन भइरहेका छन्।
-मूल्य वृद्धि न्यून विन्दुमा छ, जसले पैसा ‘निष्क्रिय (Idle)’ बस्नुलाई राम्रो संकेत होइन भनी देखाउँछ।
यसको असर सरकारको राजस्वमा समेत परेको छ । उनले लगानी बढाउन नसकेसम्म यी विषयमा सुधार ल्याउन गाह्रो हुने र यसका लागि आयोगले दिएको सुझावअनुसार कर प्रणालीमा यथाशीघ्र सुधार गर्नुपर्ने बताए ।
नीतिगत स्थायित्वको अपरिहार्यता
अध्यक्ष पाण्डेले लगानी विस्तारका लागि नीतिगत स्थायित्व निकै आवश्यक हुने कुरामा जोड दिए । ‘ूस्वदेशी मात्रै होइन, विदेशी लगानीकर्ताले पनि कर सम्बन्धी नीतिहरूको स्थायित्व हेरेर मात्रै लगानी गर्ने गरेका हुन्छन् । लगानीकर्ताको लगानीको आधार समेत कर सम्बन्धी नीति पनि हुने भएको हुँदा यसलाई गहन रूपमा ध्यान दिन अनुरोध गर्न चाहन्छु।’
सीएनआईको प्रतिबद्धता
अन्त्यमा, अध्यक्ष पाण्डेले सीएनआई यस आयोगको सदस्य भएको नाताले सुझावहरूको सफल कार्यान्वयनका लागि निरन्तर पहल जारी राख्ने प्रतिबद्धता व्यक्त गरे ।
परिसंघको लक्ष्यः अर्थतन्त्रको सुधारसँगै रुपान्तरण होस् भन्ने रहेको ।
निरन्तरताः आयोगको सुझावमा केन्द्रित गरी आजको जस्तै अन्य क्षेत्रमा केन्द्रित सार्वजनिक(निजी संवादहरू आयोजना गरिने प्रतिबद्धता समेत उनले व्यक्त गरे ।
