चन्द्रागिरी नगरपालिकाका असिष्टेन्ट सवइन्जिनियरविरुद्ध भ्रष्टाचार मुद्दा
![akhatiyar-office_20191202093301_wUE2lzNPgn_PsMaeeB3JS akhatiyar-office_20191202093301_wUE2lzNPgn_PsMaeeB3JS](https://www.arthikpati.com/wp-content/uploads/2024/01/akhatiyar-office_20191202093301_wUE2lzNPgn_PsMaeeB3JS-1000x562.jpg)
काठमाडौं । अख्तियार दुरुपयोग अनुसन्धान आयोगले काठमाडौंको चन्द्रागिरी नगरपालिका–१४ वडा कार्यालयमा कार्यरत असिष्टेन्ट सवइन्जिनियरविरुद्ध भ्रष्टाचार मुद्दा दायर गरेको छ ।
अख्तियारका सहायक प्रवक्ता देवीप्रसाद थपलियाले असिष्टेन्ट सवइन्जिनियर विजय लक्ष्मी पन्तविरुद्ध हिजो आइतबार विशेष अदालत काठमाडौंमा भ्रष्टाचार मुद्दा दायर गरेको जानकारी दिए।
भवन निर्माण सम्पन्न भएको प्रमाणपत्र दिने क्रममा सेवाग्राहीसँग घुुस माग गरेको भन्ने सूचना एवम् उजुरीका आधारमा अख्तियारको टोली पन्तलाई सेवाग्राहीबाट २५ हजार रुपियाँ घुस लिइसकेको अवस्थामा नियन्त्रणमा लिएको थियो ।
पन्तविरुद्ध २५ हजार रुपियाँ विगो कायम गरी भ्रष्टाचार निवारण ऐन बमोजिम विशेष अदालत काठमाडौंमा आरोपपत्र दायर गरेको सहायक प्रवक्ता थपलियाले जानकारी दिए ।