जनवरीमा १७ हजार पर्यटक नेपाल आए |

काठमाडौं । २०२२ को जनवरी महिनाभरिमा झन्डै १७ हजार पर्यटकले नेपाल भ्रमण गरेका छन् । सन् २०२१ को सेप्टेम्बरबाट नेपालले पूर्ण खोप लगाएका पर्यटकलाई अन अराइभल भिसा दिने नीति लिएसँगै पर्यटक बढेको भए पनि ओमिक्रोनको संक्रमण बढेसँगै फेरि पर्यटक आगमनमा गिरावट आएको हो ।

नेपाल पर्यटन बोर्डले उपलब्ध गराएको तथ्यांक अनुसार जनवरीमा हवाई मार्ग भएर नेपाल आउने पर्यटकको संख्या १६ हजार ९ सय ७५ जना रहेको छ । त्यसमा सबैभन्दा बढी भारतबाट ३ हजार ९ सय १६ जना रहेका छन् । अक्टोबर र नोभेम्बरमा पर्यटकको आगामनमा राम्रो वृद्धि देखिएको थियो तर युरोप, अमेरिका, भारत हुँदै नेपालमा समेत कोरोनाको नयाँ भेरियन्टको ओमिक्रमको संक्रमितको संख्या बढेपछि भएको बुकिङ समेत क्यान्सिल हुन थालेको होटल व्यवसायीहरु बताउँछन् । त्यसमाथि नेपालले माघ महिनामा केही समय स्कुल बन्द गरेर अनलाइनमार्फत पढाई सञ्चालन गर्ने एवम् सवारी साधनहरुमा समेत जोरविजोर प्रणाली लागु गरेपछि झनै पर्यटनका असर गरेको पर्यटन व्यवसायीहरु बताउँछन् ।

जनवरीमा दक्षिण एसियाबाट भारतपछि सबैभन्दा बढी नेपाल भ्रमण गर्ने राष्ट्रको सूचीमा बंगलादेशी पर्यटक रहेका छन् । जनवरीमा १२ सय ३६ जना बंगलदेशी पर्यटकले नेपाल भ्रमण गरेका छन् । समग्र दक्षिण एसियाबाट ५ हजार ५ सय १ जनाले नेपालको भ्रमण गरेको तथ्यांक छ ।

भारतपछि सबैभन्दा बढी अमेरिकी नागरिकले नेपाल भ्रमण गरेका छन् । जनवरीमा ३२ सय ५७ जना अमेरिकीले नेपाल भ्रमण गरेका छन् । त्यसैगरी युरोपेली मुलुकबाट बेलायतबाट १ हजार ८ सय २४ जनाले नेपाल भ्रमण गरेको छ ।

दक्षिण एसियाबाहेकको बाँकी एसियाली देशबाट १ हजार १ सय १४ जना, युरोपेली मुलुकबाट ३ हजार ५ सय २७ जना र ओसनियाली मुलुकहरुबाट १२ सय ४० जना नेपाल भ्रमणमा आएको छन् । सन २०२१ को जनवरीमा नेपालमा ८ हजार ८ सय ७४ जनाले मात्रै नेपाल भ्रमण गरेका थिए भने २०२२ को जनवरीमा ९१.३ प्रतिशतले पर्यटक आगमनमा वृद्धि भएर १६ हजार ९ सय ७५ पुगेको पर्यटन बोर्डले जनाएको छ ।