क्यान महासंघमा नेतृत्व परिवर्तन: चिरञ्जीवी अधिकारीले सम्हाले कार्यवाहक अध्यक्षको जिम्मेवारी
काठमाडौँ । नेपालको सूचना तथा सञ्चार प्रविधि क्षेत्रको छाता संगठन कम्प्युटर एसोसिएसन नेपाल महासंघ (क्यान महासंघ) मा ठुलो नेतृत्व फेरबदल भएको छ । महासंघकी अध्यक्ष सुनैना घिमिरे पाण्डेले व्यक्तिगत कारण देखाउँदै स्वस्फूर्तरुपमा आफ्नो पदबाट राजीनामा दिएकी छन् ।
पाण्डेले आफुले राजिनामा दिएको कुरा कार्यसमिति लाई पनि जानकारी दिइसकेको क्यान महासंघका एक सचिवले जानकारी दिए । पाण्डेको राजीनामा स्वीकृत भएसँगै क्यान महासंघका वरिष्ठ उपाध्यक्ष चिरञ्जीवी अधिकारीले नयाँ कार्यवाहक अध्यक्षको जिम्मेवारी पाएका छन् ।
क्यान महासंघको इतिहासमै पहिलो महिला अध्यक्षका रूपमा सर्वसम्मत निर्वाचित भएर ऐतिहासिक नेतृत्व सम्हालेकी सुनैना घिमिरे पाण्डेले व्यक्तिगत कार्यव्यस्तताका कारण पदबाट मार्गप्रशस्त गरेकी हुन ।
त्यस्तै कार्यवाहक अध्यक्षको जिम्मेवारी पाएका चिरञ्जीवी अधिकारी नेपालीसहित अन्तर्राष्ट्रिय सूचना प्रविधि एवं साइबर सुरक्षा क्षेत्रमा दुई दशकभन्दा लामो अनुभव बोकेका स्थापित विज्ञ हुन । उनले यसअघि महासंघमा वरिष्ठ उपाध्यक्षका रूपमा नीतिगत नेतृत्व प्रदान गर्दै आएका थिए् ।
कार्यवाहक अध्यक्ष अधिकारीको नेतृत्वमा क्यान महासंघले ’डिजिटल नेपाल’ को राष्ट्रिय मार्गचित्र कार्यान्वयन, ’मेड इन नेपाल’ सफ्टवेयर इकोसिस्टमको प्रवद्र्धन, स्टार्टअप मैत्री नीति र डिजिटल सुरक्षा सुदृढीकरणका चालु एजेन्डाहरूलाई थप तीव्र गतिमा अगाडि बढाउने अपेक्षा गरिएको छ ।
कम्प्युटर एसोसिएसन नेपाल महासंघ (क्यान महासंघ) नेपालको सूचना तथा सञ्चार प्रविधि क्षेत्रमा क्रियाशील व्यवसायी, विज्ञ, संस्था र प्रविधिप्रेमीहरूको प्रतिनिधित्व गर्ने सर्वोच्च निकाय हो ।
