‘प्रतिष्ठित निर्माण व्यवसायीहरूलाई कानून विपरित गरिएको धरपकड निन्दनीय’
काठमाडौं । मुलुकका प्रतिष्ठित एवं अग्रज निर्माण व्यवसायीहरूमाथि प्रहरी प्रशासनबाट निरन्तर भइरहेको धरपकड र थुनछेकप्रति गम्भीर ध्यानाकर्षण भएको नेपाल निर्माण व्यवसायी महासंघले जनाएको छ ।
महासंघका महासचिव शिवहरि घिमिरले मंगलवार विज्ञप्ति जारी गर्दै प्रतिष्ठित निर्माण व्यवसायीहरूमाथि प्रहरी प्रशासनबाट भएको धरपकड एवं थुनछेक निन्दनीय भएको उल्लेख गरेका हुन् ।
इन्धन तथा निर्माण सामाग्रीहरूमा भइरहेको अप्रत्याशित एवं अत्यधिक मूल्यवृद्धिका कारण राज्यले समयमै मूल्य समायोजन नदिँदा निर्माण कार्यहरू गर्न सक्ने अवस्था नभएको परिस्थितिमा निर्माण व्यवसायीहरूलाई ठूलो आर्थिक एवं मानसिक दबाबमा परेकै बखत धरपकड गरिएकोमा विज्ञप्तीमा कडा आपत्ति जनाइएको छ ।
अहिलेको विषम परिस्थितिमा निर्माण व्यवसायीहरूलाई राहत दिनुको सट्टा सार्वजनिक खरिद ऐन, नियम र खरिद सम्झौताका सर्त विपरित गरिएको धरपकड गैर कानूनी भन्दै महासंघले खेद प्रकट गरेको छ ।
‘अनुसन्धान पश्चात दोषी प्रमाणित भए जो कोही पनि प्रचलित ऐन, कानून अनुसार दण्डित हुनैपर्छ भन्ने मान्यता महासंघको रहेकोमा नेपालको संविधानले सुनिश्चित गरेको सम्मानपूर्वक बाँच्न पाउने अधिकार, कसुर प्रमाणित नभएसम्म कसुरदार नमानिने व्यवस्थाप्रति महासंघ सबैलाई स्मरण गराउन चाहन्छ’ विज्ञप्तिमा अगाडि उल्लेख छ ।
निर्माण उद्योग लगायत निजी क्षेत्रका उद्यमीलाई त्रसित एवं आतंकित पारिएको अवस्थामा अर्थतन्त्र, रोजगारी, राजश्व एवं पूर्वाधार निर्माणमा समेत गम्भीर असर पर्ने निश्चित भएको महासंघको ठहर छ ।
सरकारले अब फेरि निर्माण व्यवसायीहरूमाथि विना कुनै ठोस आधार तथा प्रमाण धरपकड तथा थुनछेक गर्ने कार्य गरेमा महासंघ कडा कदम चाल्न बाध्य हुने विज्ञप्तिमा उल्लेख छ ।
