महाशिवरात्रीको तयारी अन्तिम चरणमा, पशुपतिमा ८ लाख दर्शनार्थी र ४ हजार साधुसन्त सहभागी हुने
काठमाडौं । पशुपति क्षेत्र विकास कोषले महाशिवरात्री पर्वको तयारी अन्तिम चरणमा पुगेको जनाएको छ।
बिहीबार आयोजित पत्रकार सम्मेलनमार्फत कोषले यस वर्षको व्यवस्थापन, सुरक्षा र दर्शन व्यवस्थाबारे विस्तृत जानकारी दिएको हो।
कोषका अनुसार यस वर्ष महाशिवरात्रीका दिन करिब ८ लाख दर्शनार्थीले पशुपतिनाथको दर्शन गर्न सक्ने अनुमान गरिएको छ भने करिब ४ हजार साधुसन्तहरूको सहभागिता रहनेछ। पर्वलाई व्यवस्थित र सुरक्षित बनाउन ट्राफिक व्यवस्थापन, सुरक्षा प्रबन्ध तथा सहज दर्शनको व्यवस्था मिलाइएको जनाइएको छ।
दर्शनार्थीहरूको सुविधाका लागि यस वर्ष चार वटा प्रवेश मार्ग तय गरिएको छ। मैतीदेवी, बत्तिसपुतली तथा पुरानो बानेश्वर क्षेत्रबाट आउनेहरूलाई गौशाला–पिंगलास्थान गेट हुँदै प्रवेशको व्यवस्था गरिएको छ। भक्तपुर, ललितपुर, कोटेश्वर र तीनकुनेतर्फबाट आउने दर्शनार्थीहरू राम मन्दिर–आर्यघाट मार्ग प्रयोग गर्न सक्नेछन्। त्यसैगरी, जोरपाटी, कपन र चाबहिल क्षेत्रबाट आउनेहरूका लागि गौरिघाट मार्ग निर्धारण गरिएको छ भने रातोपुल–कालोपुलतर्फबाट आउने दर्शनार्थीहरूले जयबागेश्वरी मन्दिरतर्फबाट प्रवेश गर्न सक्ने व्यवस्था मिलाइएको कोषले जनाएको छ।
यस वर्ष फागुन ३ गते महाशिवरात्री पर्व परेको छ।
