सिटिजन्स बैंकद्वारा बेबी लाइफ होमलाई आर्थिक सहयोग
काठमाडौं । सिटिजन्स बैंक इन्टरनेसनल लिमिटेडले आफ्नो १८औं वार्षिकोत्सवको अवसरमा संस्थागत सामाजिक उत्तरदायित्व अन्तर्गत एच.आई.भी संक्रमित बालबालिकाको संरक्षण, शिक्षा र उपचारमा समर्पित संस्था बेबी लाइफ होम लाई रु २ लाख आर्थिक सहयोग प्रदान गरेको छ ।
बैंकले एक कार्यक्रमकाबीच उक्त रकम संस्थाका सञ्चालक राज कुमार पुनलाई हस्तान्तरण गरेको हो । पुनले उक्त सहयोग बालबालिकाको खानपान, शिक्षा र स्वास्थ्योपचारमा खर्च गरिने जानकारी दिए ।
बेबी लाइफ होम विगत डेढ दशकदेखि विशेष गरी विपन्न वर्गमा जन्मेका एच.आई.भी पोजिटिभ बालबालिकाको हेरचाह, शिक्षादीक्षा तथा पुनःस्थापना गर्दै आएको सामाजिक संस्था हो । हाल सो संस्थामा २७ जना बालबालिकाले आश्रय लिइरहेका छन् ।
सिटिजन्स बैंकले प्रत्येक वर्ष वार्षिकोत्सवको अवसरमा सामाजिक रूपान्तरणमा योगदान पुर्याउने संस्थालाई आर्थिक सहयोग गर्दै आएको जनाएको छ । यसै क्रममा यसपटक बेबी लाइफ होमलाई सहयोग गरिएको हो ।
बैंकले आगामी दिनमा पनि सामाजिक, आर्थिक, शैक्षिक र सांस्कृतिक क्षेत्रमा सकारात्मक प्रभाव पार्ने उद्देश्यसहित विभिन्न संस्थागत सामाजिक उत्तरदायित्व कार्यक्रम सञ्चालन गर्ने योजना सार्वजनिक गरेको छ ।
सिटिजन्स बैंकले विगत १८ वर्षदेखि विश्वासिलो र सर्वसुलभ बैंकिङ सेवा प्रदान गर्दै आइरहेको छ । सामाजिक दायित्वलाई प्राथमिकतामा राख्दै अघि बढिरहेको बैंकको यस्तो पहलले वित्तीय संस्थाहरूको मानवीय भूमिकाप्रति थप विश्वास जगाउने विश्वास गरिएको छ ।
