फेसन नेटवर्कद्वारा क्यान्सर विरुद्ध चेतना जगाउने उद्देश्यले ‘नो सेभ नोभेम्बर फेसन फर कज’को आयोजना |
काठमाडौं । फेसन नेटवर्क नेपालले क्यान्सर विरुद्ध चेतना जगाउने उद्देश्यले नो सेभ नोभेम्बर फेसन फर कज आयोजना गरेको छ ।
फेसन नेटवर्क नेपालले नो सेभ नोभेम्बर फेसन फर कज इभेन्ट २७ नोभेम्बर २०२१, शनिबार छायाँ सेन्टर, ठमेल, काठमाडौँमा आयोजना गरेको छ।
फेसन कोच, कोरियोग्राफर र अभिनेता प्रशान्त ताम्राकारले क्यान्सरविरुद्ध चेतना जगाउन र मद्दत गर्न यो कार्यक्रमको आइडिया सुरु गरेका छन् ।
नो सेभ नोभेम्बर एक महिना लामो अभियान हो जुन हरेक वर्ष विश्वभरि क्यान्सर रोकथाम, अनुसन्धान र शिक्षा, जीवन बचाउन र लडाइँ लड्नेहरूलाई सहयोग गर्नको लागि सचेतना र कोष जुटाउन विश्वभर मनाइन्छ।
विभिन्न व्यक्तित्वहरूलाई ‘क्यान्सरविरुद्ध लड्न सँगै हिडौं’ भन्ने नाराका साथ एक ठाउँमा भेला गर्न र कोष सङ्कलन रदान गर्न, क्यान्सर विरुद्धको लडाईलाई समर्थन गर्न सुरु गरिएको कार्यक्रममा विभिन्न सेलिब्रेटीहरू, व्यावसायी, परिवार र बालबालिकाहरूले भाग लिएका थिए।
उनीहरु सबैले रनवेमा सचेतना र सहयोग सन्देश सहितका विभिन्न कार्ड बोकेर हिँड्दै क्यान्सर विरुद्धको लडाइमा आफ्नो ऐक्यबद्धता देखाएका थिए । धेरै कम्पनी र ब्रान्डहरूले आफ्नो समर्थन विस्तार गर्न यस कार्यक्रमलाई समर्थन र प्रायोजित गरेका थिए।
कार्यक्रममा नेपाल सौन्दर्य कला व्यावसाय संघका अध्यक्ष तथा वरिष्ठ सौन्दर्यविद् कमला श्रेष्ठ, अभिनेता सरोज खनाल, सञ्चारकर्मी मालविका सुब्बा, सरिता श्री ज्ञवाली, समीरमणि दीक्षित, उरुषा जोशी, मिस नेपाल इभाना मानन्धर, गायिका अभया सुब्बा डा. सुजिता हिराचन, नेपाल ब्रेस्ट क्यान्सर फाउन्डेसन, दक्षिण भारतमा रहेका अभिनेता तथा निर्देशक विष्णु अधिकारी र अन्य धेरै प्रतिष्ठित अतिथिहरू सहित अन्य सहभागीहरू रनवेमा सहभागी थिए ।
कार्यक्रममा गायक अल्मोडा राणा उप्रेती, मेघा श्रेष्ठ, आफ्रिता खड्गी र सन्देश राई कोइरालाको दमदार प्रस्तुति रहेको थियो ।
फेसन नेटवर्क नेपालका संस्थापक प्रशान्त ताम्राकार र शेखर राज कसजुले रनवे सहभागिताबाट सङ्कलन भएको कोष नेपाल क्यान्सर रिलिफ सोसाइटी र नेपाल ब्रेस्ट क्यान्सर फाउन्डेसनलाई हस्तान्तरण गरिने बताए ।
प्रशान्त ताम्राकारले थपे, “अत्यधिक प्रतिक्रिया र समर्थनले हामीलाई यस उद्देश्यका लागि उत्प्रेरित गरेको छ र आगामी वर्षहरूमा यो कार्यक्रमलाई अझ ठूलो र प्रभावकारी रूपमा सञ्चालन गर्न हामी समर्पित छौं।”
