नाडाको स्वर्ण उत्सव समारोह सम्पन्न (तस्विरहरु)
काठमाडौं । नेपाल उद्योग वाण्ज्यि महासंघका अध्यक्ष अन्जन श्रेष्ठको प्रमुख आतिथ्यतामा नाडा अटोमोवाइल्स एशोसिएशन अफ नेपालको स्वर्ण उत्सव उद्घाटन समारोह काठमाडौंमा सम्पन्न भएको छ । नाडाका अध्यक्ष सुरेन्द्रकुमार उप्रेतीको सभापतित्वमा स्वर्ण उत्सव उद्घाटन गरिएको हो ।
वि.सं.२०३२ सालमा स्वर्गिय तोलाराम दुगडले काठमाडौं जिल्लामा स्थापना गरेको नाडा अटोमोवाइल्स एशोसिएशन अफ नेपालले आफ्नोे ५० औं बर्षकोे शुभ–अवसरमा विभिन्न कार्यक्रमहरु सहित ऐतिहासिक स्वर्ण उत्सव समारोहको आयोजना गरेको हो ।
नाडाले आफ्नो ऐतिहासिक स्वर्ण उत्सवलाई सभ्झनायोग्य बनाउन दशरथ र·शाला त्रिपुरेश्वरदेखि होटेल याक एण्ड यति दरबारमार्गसम्म विभिन्न विशिष्ट व्यक्तित्वहरु, नाडा केन्द्रीय कार्यसमितिका पदाधिकारी तथा सदस्यहरु, नाडाका पूर्व अध्यक्षहरु, नाडाका सम्पूर्ण सदस्य कम्पनीहरु र पत्रकारहरुको सहभागितामा वाकाथन कार्यक्रम समेतको आयोजना गरेको हो ।
यसै स्वर्ण उत्सवको अवसरमा नाडाले आफ्ना पूर्व अध्यक्षहरुलाई विशेष सम्मान समेत गरेको छ । यो स्वर्ण उत्सव समारोह आजदेखि १९ गतेसम्म सप्ताहव्यापी रुपमा विभिन्न कार्यक्रमहरु सहित राजधानी र ७ वटै प्रदेशहरुमा सम्पन्न हुनेछन् ।
यो ५० बर्षको अवधिमा नाडाले २३ वटा अधिवेशनहरु सम्पन्न गरिसकेको छ भने अहिलेसम्म २१ जना अध्यक्षहरुले नाडाको सफल नेतृत्व समेत गरिसकेका छन् । त्यसैगरी यस अवधिमा नाडाको वार्षिक प्रकाशनको रुपमा ३६ औं संस्करणको नाडा अटोमोवाइल ट्रेड डाइरेक्ट्री र ५१ औं संस्करणको नाडा अटो न्यूज समेत प्रकाशित गरिसकेको छ । त्यस्तै अहिलेसम्म १८ औं संस्करणको नाडा अटो ड्राइभ क्यालेण्डर प्रकाशित गरेको छ भने यही भदौ महिनामा १८ औं संस्करणको नाडा अटो शो समेतको आयोजना गर्ने क्रममा रहेको छ । त्यसैगरी नाडा नेपाल उद्योग वाणिज्य महासंघमा आवद्ध बस्तुगत संघहरु मध्ये सो महासंघबाट उत्कृष्ट वस्तुगत एशोसिएशनको पुरस्कारबाट पटक पटक सम्मानित भईसकेको छ । नाडा सन् २०१५ देखि ISO 9001:2015 QMS Certified Organizationको रुपमा स्थापित रहेको छ ।
त्यसैगरी नाडाले आफ्नो सामाजिक उत्तरदायित्व अन्तर्गत देशव्यापी रुपमा विभिन्न सामाजिक महत्वका कार्यक्रमहरु सम्पन्न गर्दै विभिन्न राष्ट्रिय विपत्तिहरुमा समेत सहयोगी भूमिका निर्वाह गर्दै आएको छ । यस स्वर्ण उत्सव महोत्सव कार्यक्रमको संयोजन तथा धन्यवाद ज्ञापन नाडाका उपाध्यक्ष विक्रम सिंघानियाले गरेका थिए भने सो महोत्सवको कार्यक्रम संचालन नाडाका महासचिव मिलनबाबु मल्लले गरेका थिए ।
