मनराम ग्रुपद्वारा नयाँ नेतृत्व नियुक्ति, अन्तर्राष्ट्रिय विस्तारलाई तीव्रता
काठमाडौं । नेपालको अग्रणी उत्पादन तथा निर्यात कम्पनी मनराम ग्रुपले आफ्नो विभिन्न व्यवसायिक इकाइहरूमा नयाँ नेतृत्व नियुक्त गरेको घोषणा गरेको छ। दुई दशकभन्दा बढी समयदेखि सञ्चालनमा रहेको कम्पनीले नवप्रवर्तन, विश्वव्यापी विस्तार तथा दिगो विकासलाई थप मजबुत बनाउने उद्देश्यले उक्त कदम चालेको जनाएको छ।
कम्पनीका अनुसार, प्रदिक्षा शर्मालाई मनराम हिमालयन ह्यान्डिक्राफ्ट प्रा.लि.को प्रमुख कार्यकारी अधिकृत (CEO) मा नियुक्त गरिएको छ भने सागर केसीलाई मनराम फार्म प्रा.लि.को प्रमुख कार्यकारी अधिकृत (CEO) को जिम्मेवारी दिइएको छ। यी रणनीतिक नियुक्तिहरूले आन्तरिक तथा अन्तर्राष्ट्रिय बजारमा कम्पनीको विस्तारलाई अझ तीव्र बनाउने अपेक्षा गरिएको छ।
सन् २००३ मा स्थापना भएको मनराम ग्रुपले प्रारम्भिक चरणमा परम्परागत नेपाली उत्पादनहरू—जस्तै छुर्पी (कुकुरका लागि च्यु) र हस्तकलाका सामग्रीहरू—संयुक्त राज्य अमेरिकामा निर्यात गरेर आफ्नो व्यवसाय सुरु गरेको थियो। समयसँगै कम्पनीले कृषि, डेरी, पेट उत्पादन, खाद्य सेवा तथा उत्पादन क्षेत्रलगायत विभिन्न क्षेत्रमा आफ्नो उपस्थिति विस्तार गर्दै आएको छ। हाल ग्रुपमा ४५० भन्दा बढी कर्मचारी कार्यरत छन्।
कम्पनीले गुणस्तर, नैतिक व्यावसायिक अभ्यास तथा नवप्रवर्तनलाई प्राथमिकता दिँदै स्थानीय स्रोतको अधिकतम उपयोग गरिरहेको जनाएको छ। विशेष गरी महिला सशक्तीकरणमा कम्पनीको योगदान उल्लेखनीय रहेको बताइएको छ।
नियुक्तिका विषयमा मनराम ग्रुपका अध्यक्ष सुमन श्रेष्ठले नयाँ नेतृत्वले कम्पनीको दीर्घकालीन रणनीतिलाई थप सुदृढ बनाउने विश्वास व्यक्त गरे। “नयाँ नेतृत्वले नवप्रवर्तन, कार्यक्षमता र अन्तर्राष्ट्रिय विस्तारमा महत्वपूर्ण भूमिका खेल्नेछ,” उनले भने।
व्यावसायिक विस्तारसँगै कम्पनी सामाजिक उत्तरदायित्वप्रति पनि सक्रिय रहँदै आएको छ। मनराम फाउन्डेसनमार्फत शिक्षा क्षेत्रमा पुस्तकालय स्थापना तथा छात्रवृत्ति कार्यक्रम सञ्चालन गर्दै आएको कम्पनीले जनाएको छ।
अन्तर्राष्ट्रिय बजारमा निरन्तर विस्तार र विविध उत्पादन पोर्टफोलियोमार्फत मनराम ग्रुपले नेपालको निर्यात क्षेत्रलाई सुदृढ बनाउँदै व्यापार घाटा न्यूनीकरणमा योगदान पुर्याउने लक्ष्य लिएको छ। साथै, नेपाली उत्पादनलाई विश्व बजारमा स्थापित गर्ने दिशामा कम्पनी अघि बढिरहेको जनाएको छ।
