आन्द्रे रसेलको अलराउन्ड प्रदर्शनमा विराटनगरको पहिलो जित
काठमाडौं । आन्द्रे रसेलले ब्याटिङ, बलिङ र फिल्डिङ तीनै क्षेत्रमा उत्कृष्ट प्रदर्शन गरेपछि नेपाल प्रिमियर लिग (एनपीएल) अन्तर्गत शनिबार भएको खेलमा विराटनगर किंग्सले सुदूरपश्चिम रोयल्सलाई ३५ रनले पराजित गरेको छ ।
वर्षाका कारण ५ ओभरमा छोट्याइएको खेलमा विराटनगरले दिएको १०६ रनको लक्ष्य पछ्याएको सुदूरपश्चिमले निर्धारित ५ ओभरमा २ विकेट गुमाएर ७० रन मात्र बनाउन सक्यो। तीन खेल खेलेपछि विराटनगरले पहिलो जित निकालेको हो। यससँगै विराटनगरले २ अंक जोड्दै प्रतियोगितामा अंकको खाता खोलेको छ ।
रसेलको ब्याटिङ, बलिङ र फिल्डिङमा कमाल
विराटनगरको जितमा आन्द्रे रसेल नायक बने । उनले ब्याटिङतर्फ अविजित २९ रन बनाउनुका साथै बलिङमा १ विकेट लिए । त्यस्तै, फिल्डिङमा पनि एक क्याच लिएर टोलीको जितमा योगदान दिए । बलिङमा रसेलले २ ओभरमा मात्र ८ रन खर्चिएर १ विकेट लिए । एन्जेलो म्याथ्युजले १ ओभरमा १५ रन खर्चेर १ विकेट हात पारे ।
सुदूरपश्चिमका लागि स्कट कुगेलेइनले अविजित २८ रन बनाए । त्यस्तै, आरिफ शेखले अविजित १७ र ओपनर सैफ जैबले १७ रनको योगदान दिए । जैबले १० बलमा २ छक्का प्रहार गरेका थिए ।
१०६ रनको लक्ष्य पछ्याउने क्रममा सुदूरपश्चिमले पहिलो बलमै ओपनर शेरफान रदरफोर्डलाई गुमाएको थियो। उनलाई आन्द्रे रसेलले आउट गरेका थिए। त्यसपछि दोस्रो ओभरमा कप्तान दीपेन्द्रसिंह ऐरी पनि आउट भएपछि सुदूरपश्चिम ७ रनमै २ विकेट गुमाएर दबाबमा परेको थियो । एकातिरबाट सैफ जैबले आक्रामक ब्याटिङ गर्ने प्रयास गरे पनि विराटनगरका बलरले थप ठूलो रन बनाउन दिएनन् ।
विराटनगरको विस्फोटक ब्याटिङ, ५ ओभरमा १०५ रन
त्यसअघि कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको विराटनगरले निर्धारित ५ ओभरमा २ विकेट गुमाएर १०५ रन बनाएको थियो । विराटनगरका लागि ओपनर शेहान जयसूर्याले सर्वाधिक ३९ रन बनाए । उनले ११ बलमा २ चौका र ५ छक्का प्रहार गरे ।
त्यस्तै, अर्का ओपनर लोकेश बमले १० बलमा १ चौका र ३ छक्काको मद्दतमा २५ रन जोडे । आन्द्रे रसेलले १० बलमा २ चौका र ३ छक्का प्रहार गर्दै अविजित २९ रन बनाए । विराटनगरले सुरुवातदेखि नै आक्रामक ब्याटिङ गरेको थियो।
सुदूरपश्चिमका लागि एनपीएलमा डेब्यु गरेका श्रीलंकन स्पिनर थरिन्दु रत्नायाकेले पहिलो ओभर बलिङ गरेका थिए । उनको पहिलो ओभरमा जयसूर्याले ५ छक्का प्रहार गरेपछि विराटनगरले एकै ओभरमा ३५ रन जोडेको थियो । जयसूर्या र लोकेश बमको विस्फोटक ब्याटिङका कारण विराटनगरले केवल ८ बलमै अर्धशतक पूरा गरेको थियो ।
जयसूर्या तेस्रो ओभरमा अभिनाश बोहराको बलमा एलबीडब्ल्यू आउट भए। सुरुमा अम्पायरले आउट नदिए पनि विराटनगरले रिभ्यु लिएपछि उनी आउट घोषित भएका थिए । त्यसपछि क्रिजमा आएका रसेलले लोकेश बमसँग मिलेर आक्रामक ब्याटिङलाई निरन्तरता दिए ।
अन्तिम बलमा लोकेश बम आउट भए पनि विराटनगरले ५ ओभरमा १०५ रनको विशाल योगफल तयार पारेको थियो। सुदूरपश्चिमका अभिनाश बोहराले २ ओभरमा २८ रन खर्चेर १ विकेट लिए ।
यस जितसँगै विराटनगरले प्रतियोगितामा पहिलो सफलता हात पारेको छ भने सुदूरपश्चिमले छोटो ओभरको प्रतिस्पर्धामा ३५ रनको हार बेहोरेको छ ।
