इंग्ल्यान्डमाथि अर्जेन्टिनाको सानदार पुनरागमन, उपाधिका लागि फाइनलमा
काठमाडौं । फिफा विश्वकप २०२६ को दोस्रो सेमिफाइनलमा साविक विजेता अर्जेन्टिनाले इंग्ल्यान्डविरुद्ध २–१ को रोमाञ्चक पुनरागमन जित निकाल्दै फाइनलमा स्थान सुरक्षित गरेको छ। अमेरिकाको एटलान्टा स्टेडियममा भएको खेलमा एक गोलले पछि परेको अवस्थालाई उल्टाउँदै अर्जेन्टिनाले सानदार जित दर्ता गर्यो।
खेलको पहिलो हाफ गोलरहित बराबरीमा सकिएको थियो। दोस्रो हाफको ५५औँ मिनेटमा मोर्गन रोजर्सको क्रसमा एन्थोनी गोर्डनले गोल गर्दै इंग्ल्यान्डलाई सुरुवाती १-० को अग्रता दिलाएका थिए।
खेलको अन्तिम समयमा कप्तान लियोनल मेसीको जादुमयी प्रदर्शनमा अर्जेन्टिना खेलमा फर्कियो। ८५औँ मिनेटमा मेसीको पासमा एन्जो फर्नान्डेजले डिबक्स बाहिरबाट उत्कृष्ट प्रहार गर्दै खेललाई १–१ को बराबरीमा ल्याए।
खेल अतिरिक्त समयतर्फ धकेलिने निश्चित देखिँदै गर्दा, दोस्रो हाफको थप गरिएको समय (९०+२ मिनेट) मा फेरि मेसीकै क्रस पासमा वैकल्पिक खेलाडी लाउटारो मार्टिनेजले हेडमार्फत गोल गर्दै अर्जेन्टिनालाई २–१ को सनसनीपूर्ण जित दिलाए।
🏆 फाइनलमा ऐतिहासिक भिडन्त
यो ऐतिहासिक जितसँगै अर्जेन्टिना विश्वकपको इतिहासमा सातौँपटक फाइनलमा पुग्न सफल भएको छ। अब उपाधिका लागि आगामी आइतबार न्युयोर्क न्यू जर्सीको मेटलाइफ स्टेडियममा अर्जेन्टिना र स्पेनबीच महाभिडन्त हुनेछ।
विश्वकपको इतिहासमा साविक युरोपेली च्याम्पियन (स्पेन) र साविक कोपा अमेरिका च्याम्पियन (अर्जेन्टिना) फाइनलमा आमनेसामने हुन लागेको यो पहिलो पटक हो। पराजित इंग्ल्यान्डले भने तेस्रो स्थानका लागि शनिबार फ्रान्सको सामना गर्नेछ।
