हरितालिका तीजको रौनक सुरु, शान्तिश्री परियारको ‘केटी पार्टी’ बजारमा (भिडियो)

काठमाडौं। हरितालिका तीज आउन अझै करिब दुई महिना बाँकी रहे पनि नेपाली सांगीतिक बजारमा तीज गीतहरूको रौनक सुरु भइसकेको छ। हरेक वर्षझैँ यस वर्ष पनि तीज लक्षित गीतको रेकर्डिङ, म्युजिक भिडियो निर्माण तथा सार्वजनिक गर्ने क्रम तीव्र बन्दै गएको छ।

यही क्रममा लोकप्रिय गायिका शान्तिश्री परियारको स्वरमा रहेको नयाँ तीज गीत ‘केटी पार्टी’ काठमाडौंको कोटेश्वरस्थित होटल तपोवनमा आयोजित एक कार्यक्रममा सार्वजनिक गरिएको छ। साहित्यकार शान्ति शर्माको प्रमुख आतिथ्यमा सम्पन्न कार्यक्रममा गीतको भिडियो औपचारिक रूपमा सार्वजनिक गरिएको हो।

गीतमा मनिष श्रेष्ठको शब्द तथा संगीत रहेको छ भने आकाश नेपालीले एरेञ्ज, मिक्सिङ र मास्टरिङ गरेका छन्।

उमेर कहिल्यै पनि उत्साह, सिर्जनशीलता र प्रतिभा प्रदर्शनको बाधक बन्न नसक्ने सन्देश बोकेको गीतको म्युजिक भिडियोमा बिमला भण्डारी, सरिता थापा, कोइली थापा, शारदा श्रेष्ठ र नूतन अधिकारीको अभिनय तथा नृत्य रहेको छ।

भिडियोको छायांकन तथा सम्पादन पवन सुस्लिङले गरेका हुन् भने कोरियोग्राफी तथा निर्देशन मनिष श्रेष्ठले गरेका छन्। भिडियो मनिष श्रेष्ठको आधिकारिक युट्युब च्यानल ‘Manish Shrestha’ मार्फत सार्वजनिक गरिएको हो।

भिडियोमा अभिनय गरेका बिमला भण्डारी, कोइली थापा, सरिता थापा, नूतन अधिकारी र शारदा श्रेष्ठ विभिन्न सामाजिक संघ–संस्थामार्फत सामाजिक सेवामा सक्रिय रूपमा आबद्ध व्यक्तित्व हुन्। उनीहरूले रहर र उत्साहका साथ यस वर्ष तीज गीत निर्माण गरेको तथा आगामी वर्षहरूमा पनि यही टोलीबाट निरन्तर नयाँ तीज गीत ल्याउने तयारी रहेको बताएका छन्।